Kumbindi wesixeko sasekapa ngomhla we 13- ukuya kumhla we 20th kulenyanga sikuyo, sifikele esixekweni sinabisa intatho nxaxheba sidyobha, siyosulela – hayi ngentsholongwane nangezifo ntonje sibhiyoza kuluchulumanco kumnyadala wenkcubeko namasiko.
Lomcimbi ubuyimpumelelo engumangaliso kulonyaka uphelileyo ngemiboniso nemidlalo yeqonga yodidi oluphezulu nelinganiselwe nakumazwe angaphesheya. Abakwa AFRICA CENTRE banemibono yokwakha ukonwatyelwa wenkcubeko wamasiko nezithethe zabemi nabahlali besixeko.
Yibakhona phakathi kwangcungela zamazwe ngamazwe uzokuzibonela kwizithile namanqwanqwa athile apha kumbindiSixeko yonke imihla. Qhakamshelana namaphephandaba ukuze ufumane yonke ingcombolo nengcaciso ngalomnyadala. Zama ukundwendwela kwa www.infectingthecity.com .Umntu uvuma akubonileyo angqine akwaziyo, yibayinxalenye yolomnyadala khonukuze uthethe ngokubonileyo.
Kulo nyaka lomnyadala unesihloko esithi “HUMAN RITE” ukubonisa indlela athi umntu ayihambe ukufezekisa izithethe namasiko. Esisihloko siqulathe okuninzi ukuphathene neendlela esihlalisana ngazo apha kwesixeko esisebanza wena.
Yizokuzimanya uzokudla amathambo engqondo nababhexeshi balonyadala, besisihloko. Akhona amaxesha alungiselelwe ukuba kuxoxwe kuboniswane ngendlela ezizizo.
Lomnyadala ucetywe ngabakwa AFRICA CENTRE ngendlela yokumisela iqonga lokubonisa nophuhlisa inkcubeko yabemmi nabahlali besixeko beyinxalenye yabandwendweli bazinye izizwe zehlabathi.
Lomnyadala wokosulela nokudyobha isixeko uyakuvulwa ngodlwabevu ngoMgqhibelo umhla weshumi elinesithathu apha kulenyanga sikuyo, kodwa ukusukela ngomvulo umhla we shumi elinesihlanu kulenyanga imiboniso iyakuphindwa-phindwa qho-qho-qho de kuye ekupheleni kwalomnyadala ngomhla wamashumi amabini kule imiyo. Ukuba unalo ixesha, intsuku nje ezimbini zokuphumla ungananalo ithuba lokuzakonwabela unintsi lwemiboniso elungiselelwe lomnyadala. Ukuba awunathamsanqa sikukhuthaza ubandakanye imizuzu engamashumi amane anesihlanu kwixesha lakho lomsebenzi, ngolohlobo unganako ukwenza okukhulu ngethuba olinikwayo ngumnyadala wombindi sixeko.
- Sticks Mdidimba is Manager of the Indigenous Arts Department at Artscape
